အိမ်ပြန်ချင်သူတွေ စဉ်းစားဖို့ (၃)

အိမ်ပြန်ချင်သူတွေ စဉ်းစားဖို့ (၃)
#ReturningMyanmar
ရှေ့မှာရေးခဲ့တဲ့ အပိုင်း (၁) နဲ့ (၂) ကိုဖတ်ပြီးရင် ဒီလောက်တောင် အဆင်မပြေတာတွေများနေတာ ဘာတွေများ ပြန်လာချင်စရာ ရှိသေးလဲလို့ မေးချင်စရာပါ။ မြန်မာနိုင်ငံမှာ ပြန်လာပြီး အလုပ်လုပ်တာ အခက်အခဲတွေ အမျိုးမျိုး ရှိပေမယ့် စိတ်ကြေနပ်စရာတွေကလည်း အများကြီးပါ။

(က) ကိုယ့်မြေကိုယ့်ရေဆိုတဲ့ ခံစားမှု - အင်္ဂလိပ်စကားလုံး Sense of Belonging ကို ကိုယ့်မြေကိုယ့်ရေ၊ ကိုယ်လူမျိုး၊ ကိုယ့်နိုင်ငံရယ်လို့ ပိုင်ပိုင်နိုင်နိုင်ခံစားမှုလို့ ဖွင့်ဆိုချင်ပါတယ်။ အခြားနိုင်ငံမှာလည်း ကုမ္ပဏီတစ်ခုခုမှာ ဝန်ထမ်းအဖြစ် အလုပ်လုပ်တယ်၊ မြန်မာနိုင်ငံပြန်လာတော့လည်း ကုမ္ပဏီတစ်ခုခုမှာပဲ ဝန်ထမ်းအဖြစ် အလုပ်လုပ်တယ်ဆိုပါတော့။ ကုမ္ပဏီရဲ့ Target တွေမိဖို့ ကိုယ့် KPI ပြည့်မီဖို့ အားထုတ်ကြတာပဲမို့ အလုပ်သဘောအရ ဘာမှသ်ိပ်မကွာလှပါ။ ဒါပေမယ့် နှစ်ပေါင်းများစွာ တိုးတက်မှုရှားပါးခဲ့တဲ့ ကိုယ့်အမိမြေမှာ ကိုယ့်ကုမ္ပဏီက ဖေါ်ဆောင်လိုက်တဲ့ အပြောင်းအလဲကို လက်တွေ့ဘဝထဲမှာ တွေ့လိုက်ရတဲ့အခါ ရတဲ့ ခံစားချက်ဟာ ဘာနဲ့မှ နှိုင်းယှဉ်လို့ မရအောင် ကြေနပ်စရာကောင်းပါတယ်။ ဥပမာပြရရင် လွန်ခဲ့တဲ့ နှစ်နှစ်လောက်က ဖုန်းအဆက်အသွယ်ခက်ခဲတဲ့ အရပ်မှာ အခုလူများစုမှာ လက်ကိုင်ဖုန်းတွေရှိနေပြီး သူတို့အရင်က ကိုယ်တိုင်သွားပြောရတဲ့အလုပ်တွေကို အခုဖုန်းနဲ့ပြောပြီး အချိန်တိုတိုအတွင်း လုပ်လို့ရသွားတဲ့ မြင်ကွင်းမျိုး။ အရင်က ဒေါ်လာအရောင်းအဝယ်ဆိုတာ တရားမဝင်တဲ့ကိစ္စမို့ ခိုးကြောင်ခိုးဝှက်လုပ်ခဲ့ရတာကနေ အခု (အလွယ်တကူ Money Changer လို့ခေါ်ကြတဲ့) Exchange Counter တွေ ဟိုနားတစ်ခု ဒီနားတစ်ခုတွေ့ရတာမျိုး။ အရင်က ညကိုးနာရီနောက်ပိုင်းလောက်ဆို ပေါင်မုန့်လေး၊ အအေးလေး လိုချင်ရင်တောင် ဝယ်စရာနေရာမရှိခဲ့တာကနေ အခု (၂၄)နာရီဖွင့်တဲ့ စတိုးဆိုင်ချိန်းတွေကို မြင်ရတာမျိုး တွေပေါ့။ ကိုယ့်လုပ်အားဟာ ကိုယ့်မြေကိုယ့်ရေ တိုးတက်ပြောင်းလဲဖို့ တိုက်ရိုက်ပါဝင်တယ်လို့ သိလိုက်တဲ့အချိန်မှာ ရတဲ့ ခံစားချက်ဟာ စကားလုံးနဲ့ ဖေါ်ပြဖို့မလုံလောက်နိုင်အောင် စိတ်ကြေနပ်စေပါတယ်။ အဲဒီလို စိတ်ကြေနပ်မှုမျိုးကို ကိုယ့်မြေ ကိုယ့်ရေမဟုတ်တဲ့ အခြားအရပ်များမှာ ရနိုင်ခဲပါတယ်။

(ခ) မိသားစု - ကျွေးဟောင်းဆပ်ချိန်တန်သူများအတွက် မိဘကို ပြုစုစောင့်ရှောက်လို့ရတယ်။ ဒီအချက်ဟာ ပြန်လာသူအများစုရဲ့ အိမ်ပြန်လာရခြင်းအကြောင်းရင်းတွေထဲက တစ်ခုဖြစ်တယ်။ အထူးသဖြင့် မိဘတွေက ကျန်းမာရေးဂရုစိုက်ရမယ့် အချိန်ရောက်နေပြီဆိုရင် ငွေကြေးလုံလောက်အောင် ပို့ပေးယုံနဲ့ မရတော့ဘဲ ကိုယ်တိုင်ဂရုစိုက်ဖို့လိုလာပါတယ်။ ကျွေးသစ်ချထားသူများအနေနဲ့ကလည်း စဉ်းစားစရာပါပဲ။ မိဘတိုင်းဟာ ကိုယ့်သား သမီးကို ရုပ်ပိုင်း စိတ်ပိုင်းဆိုင်ရာအထောက်အပံ့ အကောင်းဆုံးပေးချင်ကြပါတယ်။ သားသမီးပြုစုပျိုးထောင်ဖို့အတွက်ဆို ဘယ်မှာပဲနေနေ အင်အားစိုက်ထုတ်မှသာ ကိုယ်ပျိုးထောင်ချင်တဲ့ပုံစံအတိုင်း ပျိုးထောင်လို့ရမှာဖြစ်ပါတယ်။ သားသမီးကို ပျိုးထောင်ဖို့ တစ်ချို့မိဘတွေက ရုပ်ပိုင်းဆိုင်ရာ ပိုပြည့်စုံတဲ့နိုင်ငံတွေကို ရွေးချယ်ကြပြီး တစ်ချို့ကတော့ သားသမီးကို (အထူးသဖြင့်) မြန်မာဓလေ့၊ မြန်မာ့စရိုက်၊ မြန်မာယဉ်ကျေးမှု တွေနဲ့ကြီးပြင်းစေချင်လို့ အိမ်ပြန်ဖို့ ရွေးချယ် ကြပါတယ်။

အနှစ်ချုပ်ရမယ်ဆိုရင် ပထမဆုံး ဒီမေးခွန်းကို မေးပါ။
"ငါ့အတွက် အခုအချိန်မှာ ဘာကအဓိကလဲ။ ငွေလား၊ ဘဝအဓိပ္ဗါယ်ရှိမှုလား။"
ငွေကို အဓိကဆိုရင် ဆက်မေးပါ။ "အကြပ်အတည်းတွေ အများကြီးထဲမှာ ငွေရှာတတ်သလား။" တတ်တယ်ဆိုရင် ပြန်ဖို့ ဆက်စဉ်းစားနိုင်ပါတယ်။ ဒါမှမဟုတ်ရင်တော့ ဖွံ့ဖြိုးတိုးတက်တဲ့ နိုင်ငံတစ်ခုမှာ ငွေဆက်ရှာပြီး စိတ်ကြေနပ်မှုရအောင် ကိုယ့်နိုင်ငံအတွက် ကိုယ့်မိသားစုအတွက် တစ်ခုခုလုပ်ပေးနေတာက ပိုကောင်းပါလိမ့်မယ်။

ပထမမေးခွန်းအတွက် အဖြေက ဘဝအဓိပ္ဗွါယ်ရှိမှု ဆိုရင် ဆက်မေးပါ။ "ဘာတွေလုပ်ရင် ဘဝ အဓိပ္ဗါယ်ရှိမှာလဲ။" ကိုယ်ဘာလုပ်ချင်တာလဲဆိုတာ ရှင်းရှင်းလင်းလင်း သိတယ်၊ ရှေ့က အပိုင်း (၁) နဲ့ (၂) မှာရေးထားတာတွေကိုလည်း စဉ်းစားပြီးပြီ ဆိုရင်တော့ Welcome Home ပါလို့။

အိမ်ပြန်ချင်သူတွေ စဉ်းစားဖို့ (၂)

အိမ်ပြန်ချင်သူတွေ စဉ်းစားဖို့ (၂)

#ReturningMyanmar

(၂) နေရေး ထိုင်ရေးနဲ့ ပါတ်သက်လာရင် ဒါတွေကို စဉ်းစားသင့်ပါတယ်။

အခြေခံအဆောက်အအုံ - Infrastructure ကို ခဏခဏတွေ့နေတဲ့ အခြေခံအဆောက်အအုံလို့ပဲ သုံးလိုက်ပါတယ်။ ရေ၊ မီး၊ လမ်း၊ အများသုံး ခရီးသွားစနစ်၊ ဖုန်းလိုင်း နဲ့ အင်တာနက် အဆက်အသွယ် အားလုံးပါပါတယ်။ အများသိတဲ့ အတိုင်း ထိုင်း၊ မလေးရှား၊ စင်ကာပူတွေထက် အဖက်ဖက်က ညံ့ ပါတယ်။ အခြေခံအဆောက်အအုံ မခိုင်မာမှုက  အိမ်မှာနေတာအပြင် အလုပ်ခွင်မှာလည်း ထိခိုက်နိုင်ပါတယ်။ ကိုယ်ပိုင်လုပ်ငန်းလုပ်တဲ့သူတွေ ဆိုရင်တော့ ပြောဖွယ်ရာ မရှိပေါ့။

ပတ်ဝန်းကျင်သန့်ရှင်းရေး - ကိုယ်နေတဲ့ နေရာကိုလိုက်ပြီး ပတ်ဝန်းကျင် သန့်ရှင်းမှု ကွာပါတယ်။ ကိုယ်နေတဲ့အိမ်ကို စိတ်ကြိုက်သန့်ရှင်းလို့ ရပေမယ့် ဘေးပတ်ဝန်းကျင်က သန့်ရှင်းမှုမရှိရင်လည်း ကိုယ့်အားထုတ်မှုတွေက ထင်သလောက် အကျိုးမသက်ရောက်တာလည်း ဖြစ်နိုင်ပါတယ်။

(၃) အလုပ်ခွင်နဲ့ ပါတ်သက်လာရင် ဒါတွေကို စဉ်းစားသင့်ပါတယ်။

Three Base Line - မြန်မာနိုင်ငံမှာ လုပ်ငန်းပေါင်းစုံရှိတဲ့ထဲက ဘယ်လို လုပ်ငန်းမျိုးကို ကိုယ်ကလုပ်ချင်တာလဲ ဆိုတာ ကြိုတင်စဉ်းစားစေချင်ပါတယ်။ ဖြစ်နိုင်ရင် စာရင်းကိုင်စကားနဲ့ Triple Bottom Line လို့ခေါ်တဲ့ ငွေကြေးအကျိုးအမြတ် တစ်ခုတည်းသာမက လူမှုအသိုင်းအဝန်းနဲ့ သဘာဝပါတ်ဝန်းကျင်အပေါ် သက်ရောက်မှုတွေကို ကြည့်တဲ့ အလုပ်ရှင်တွေဆီမှာ အလုပ်လုပ်ဖို့ ဦးစားပေးစေချင်ပါတယ်။

ပွင့်လင်းမြင်သာမှု - ပြည်ပမှာ Organization Culture တော်တော်ကောင်းတဲ့ အလုပ်တွေမှာ လုပ်ဖူးတဲ့သူတွေ အတွက် အထူးစဉ်းစားစရာပါ။ အလုပ်ခွင်တိုင်းမှာ ပြောသင့်တာကို ပွင့်ပွင့်လင်းလင်း ပြောခွင့် အပြည့်အဝ ရဘူးရင် ခိုင်းထားတဲ့ တာဝန်တွေပြီးမြောက်ဖို့ စိတ်ထဲရှိသလောက် ပြောဆိုလုပ်ကိုင်ခဲ့ဘူးရင် ပိုသတိထားရမယ်ထင်ပါတယ်။ နှစ်ပေါင်းများစွာ တံခါးပိတ်ထားတဲ့ နိုင်ငံမှာ လူတွေဟာ ချက်ချင်း ပွင့်လင်းမြင်သာရှိဖို့ ခက်ပါတယ်။ တံခါးပ်ိတ်ထား ခဲ့တဲ့ နှစ်ကာလတွေဟာ လူတွေကို တစ်ယောက်နဲ့တစ်ယောက် တစ်ဌာနနဲ့ တစ်ဌာန တစ်ရုံးနဲ့ တစ်ရုံး ယုံကြည်မှု နည်းပါးစေဖို့ လိုတာထက်တောင် ပိုပါသေးတယ်။ ဒီကိစ္စတွေကို ကုစားဖို့ကတော့ ကိုယ့်ဖက်ကစပြီး ယုံကြည်မှုကို ထူထောင်ပြသဖို့ပါပဲ။ အိမ်ပြန်လာမယ်ဆိုရင် နှလုံးသားကြီးကြီး တစ်ခုတော့လိုမယ်။

အလုပ်ခွင် အဆင်သင့်ဖြစ်မှု - နိုင်ငံရပ်ခြား အလုပ်ခွင်တွေမှာ အလုပ်ကိုဝင်လာပြီ ဆိုတာနဲ့ အလုပ်ခေါ်စာထဲမှာပါတဲ့ Job Scope ကို ယျေဘူယျအားဖြင့် လုပ်နိုင်လိမ့်မယ်လို့ မျှော်လင့်လို့ရပါတယ်။ မြန်မာ့ပညာရေးစနစ်အောက်က ထွက်လာတဲ့ သူတွေကိုတော့ ဒီလိုမမျှော်လင့်စေချင်ပါဘူး။ အလုပ်လျှောက်တာကိုများများသာပစ် တစ်ခုခုတော့ ထိလိမ့်မယ် (Number Game) လို့ သဘောထားပြီး အင်တာဗျူးလာဖြေတော့မှ ဘာမှန်းမသိဖြစ်နေရင်လည်း ခွင့်လွှတ်ကြပါ။ ဒါဖြင့် အလုပ်ခွင်မှာ လူကောင်းမရနိုင်တော့ဘူးလားလို့ မေးစရာရှိပါတယ်။ မြန်မာနိုင်ငံ အလုပ်ခွင် တွေမှာ ကျင်လည်ပြီး နှစ်နှစ်လောက် ဝန်ထမ်းအခက်အခဲကို ရင်ဆိုင်ဘူးသူတွေက လူရှာတဲ့အခါ အလုပ်အပေါ်၊ ဘဝအပေါ်မှာထားတဲ့ စိတ်သဘောထား (Attitude) ရယ်၊ အမြဲမပြတ် သင်ယူလိုစိတ်ရယ်အပေါ် တည်ပြီးခန့်ပါလို့ ပြောကြပါတယ်။ Attitude ကောင်းပြီး သင်ယူလိုစိတ်ရှိသူတွေကို ကိုယ်တိုင်သင်ပေးခွင့်ရတဲ့အခါ ကိုယ့်အတွက်လည်း အလုပ်ခွင် စိတ်ကြေနပ်မှု အများကြီးရပါတယ်။ အင်တာဗျူးတဲ့အခါ ဒီနှစ်ခုကို အကဲဖြတ်တတ်ဖို့  ခုကတည်းက လေ့ကျင့်ပေတော့။

Feedback ကိုလက်ခံနိုင်မှု - မြန်မာလိုမျိုးဟာ အတော် “အားနာ” တတ်ပါတယ်။ ကောင်းတာကို ကောင်းတယ် ပြောဖို့တောင် သူရှက်သွားရင် သူနေရခက်သွားရင် အားနာစရာလို့ တွေးတတ်တဲ့သူတွေပါ။ တစ်ဖက်ကလည်း သူ့ကို လှတယ်ပြောလိုက်ရင် ငါက ဖါးတယ်လို့များ ထင်သွားမလားလို့လည်း တွေးတတ်ပါသေးတယ်။ အဲဒီတော့ မြန်မာ့လူ့အသိုက်အဝန်းဟာ Feedback ပေးလေ့ပေးထ အလွန်နည်းပါတယ်။ တော်လို့တော်တယ်ပြောရင်တောင် နည်းနည်းသတိထားရတယ်။ ပြင်ဖို့လိုတာတွေကို ပြောတော့မယ်ဆိုရင်တော့ သတိပိုကြီးကြီးထားဖို့ လိုပါတယ်။ ဒီကိစ္စမှာလည်း သတင်းကောင်းတော့ရှိပါတယ်။ မြန်မာလူမျိုးက စေတနာကိုတန်ဖိုးထားတတ်တဲ့စိတ်လည်း ကြီးကြီးမားမား ရှိနေပြန်တော့ စေတနာထားမှန်းသိတဲ့အခါမှာတော့ ကိုယ့် Feedback ကိုတန်ဖိုးထားပြီး အရေးတယူ နာကြားကြပါတယ်။ မြန်မာနိုင်ငံအလုပ်ခွင်ကို ဝင်လာစမှာ နည်းနည်းသတိထားဖို့ပဲ လိုတာပါ။

အချိန် စီမံခန့်ခွဲမှု - အချိန်နဲ့ပါတ်သက်ရင်တော့ ကိုယ်တောင်လိုက်ပါမသွားအောင် တော်တော်ကြိုးစားဖို့ လိုမယ်လို့ မြင်ပါတယ်။ ဘေးပါတ်ဝန်းကျင်မှာ ရှိတဲ့ လူတွေ၊ ရုံးတွေ တော်တော်များများက အချိန်မလေးစားကြတော့ ကိုယ်စတဲ့ ပွဲဆို ကိုယ်တိုင်နောက်မကျအောင် သူများခေါ်တဲ့ပွဲတွေဆို သူတို့နောက်ကျလည်း ကိုယ့်အချိန်အလကားမဖြစ်ဖို့ ကြိုတင်ပြင်ဆင်သွားဖို့ လိုပါလိမ့်မယ်။

ဆက်ရန် ...

အိမ်ပြန်ချင်သူတွေ စဉ်းစားဖို့ (၁)

အိမ်ပြန်ချင်သူတွေ စဉ်းစားဖို့ (၁)

#ReturningMyanmar

အမိမြေပြင်ပရောက်နေတဲ့သူ အများစုအတွက် NLD က ကြားဖြတ်ရွေးကောက်ပွဲမှာ ဝင်ပြိုင်ပြီး အမတ်နေရာ (၄၃)ခုကိုရလိုက်တဲ့ (၂၀၁၁) ဟာ စိတ်လှုပ်ရှားစရာဖြစ်တယ်။ နိုင်ငံခြား ရောက်တာကြာလို့ အခြေနည်းနည်းကျပြီးသားသူတွေ အစကတည်းက တစ်နေ့နေ့တော့ ကိုယ်ပိုင်စီးပွားရေးလုပ်မှာပဲ ဆိုတဲ့သူတွေ မြန်မာနိုင်ငံကိုပြန်ဖို့ စပြီးစူးစမ်းကြတယ်။ (၂၀၁၃ - ၂၀၁၅) မှာ တစ်ချို့တွေက ကုမ္ပဏီအလုပ်ရလို့ တစ်ချို့ကတော့ စီးပွားရေးလုပ်ငန်း အသစ်တွေစဖို့ အခွင့်အလမ်းတွေရှိလာလို့ မြန်မာနိုင်ငံကို ပြန်အချေချကြတယ်။ (၂၀၁၅) ရွေးကောက်ပွဲရလာဒ်တွေ ထွက်လာပြီးတဲ့နောက် အိမ်ပြန်ချင်တဲ့သူတွေ ပိုများလာပါတယ်။ ပြန်ချင်တဲ့သူတွေထဲက တစ်ချို့ကျတော့ စိတ်ထဲက ဘယ်လောက်ပြန်ချင်ပေမယ့် ငွေကြေးပိုင်းဆိုင်ရာ စိတ်လုံခြုံမှုမရှိသေးလို့၊ တစ်ချို့ကျတော့ ပြန်လာရင် အလုပ်လုပ်ချင်ပေမယ့် ဘယ်လိုအလုပ်မျိုးလုပ်ရမှန်းမသိလို့၊ တစ်ချို့ကျတော့ သားသမီးအတွက် ပညာရေးနဲ့ ဘဝသက်တောင့်သက်သာရှိမှုတွေ မရနိုင်လို့ စသည်ဖြင့် အမျိုးမျိုးသောအကြောင်းတွေနဲ့ အချိန်ယူနေရသေးတယ်။ ဒီကြားထဲမှာ “မပြန်သေးဘူးလား” လို့မေးလို့ စိတ်တိုရတာတွေလည်း Facebook ကနေတစ်ဆင့် ဖတ်ရပါတယ်။

 မြန်မာပြည်ပြန်ချင်တဲ့သူတွေ ထည့်သွင်းစဉ်းစားစရာ စိန်ခေါ်မှုတွေနဲ့ တစ်ဖက်ကလည်း စိတ်ချမ်းသာရတာ တွေကို ဝေမျှလိုက်ပါတယ်။

(၁) ငွေအဝင်အထွက်နဲ့ ပါတ်သက်ရင် အောက်ကအချက်တွေကို ထည့်သွင်းစဉ်းစားသင့်ပါတယ်။

ဝင်ငွေ။  ။ ဒါကတော့အထူးပြောစရာမလိုပါဘူး။ လူတိုင်းက ကိုယ့်ဝင်ငွေ ပိုနည်းသွားမှာလား၊ များလာမှာလား စဉ်းစားကြပါတယ်။

ဝင်ငွေခွန်။  ။ မြန်မာနိုင်ငံက ဝင်ငွေခွန်ကမြင့်ပါတယ်။ မိမိအခြေချနေရာ နိုင်ငံနဲ့ ဘယ်လောက်ကွာသလဲ ဆိုတာလေ့လာသင့်ပါတယ်။ ငွေကြေးရေးရာ နားလည်လို့ ကြိုတင်တွက်ထားတဲ့ စာရင်းကိုင်လို လူတွေတောင် လကုန်လို့ ဝင်ငွေခွန်ဘယ်လောက်ဖြတ်တယ်ဆိုတာ သိလိုက်တဲ့အခါ နင့်ကနဲနေအောင် ခံစားသွားရနိုင်ပါတယ်။

ဝင်ငွေခွန်ကောက်ပုံ။  ။ အခြားနိုင်ငံတွေမှာ ဝင်ငွေခွန်ဆိုတာ တစ်နှစ်စာဝင်ငွေအပေါ်အခြေခံပြီး နှစ်ကုန်တဲ့အခါ ဝင်ငွေကြေငြာတာ အခွန်တွက်ချက်တာတွေ လုပ်ပြီးမှ တစ်လုံးတည်းဖြစ်စေ အရစ်ကျဖြစ်စေ ပေးဆောင်ကြတာပါ။ ၂၀၁၆ မြန်မာနိုင်ငံ မှာ လစဉ်က အလုပ်ရှင်က အလုပ်သမားဆီကနေ ဖြတ်ပြီး အခွန်ရုံးကို ပေးဆောင်ရပါတယ်။

အိမ် - ပြန်လာတဲ့အခါ နေစရာအိမ်ရှိသူတွေအတွက် မသိသာလှပေမယ့် အကြောင်းအမျိုးမျိုးကြောင့် အိမ်ငှားနေရမယ် ဆိုရင်အဲဒီစားရိတ်ကို သေသေချာချာတွက်ဖို့ လိုပါတယ်။ ဥပမာအနေနဲ့ ဘုရင့်နောင်လမ်းထောင့်က လမ်းဆုံက ဘုရင့်နောင်တာဝါလို နေရာမျိုးမှာ အိပ်ခန်းသုံးခန်းပါတဲ့ ယူနစ်တစ်ခုကိုငှားရင် တစ်လ ၆သိန်း နဲ့ ၈သိန်း ကြားပေးရပါတယ်။ ရန်ကင်းရွှေအုန်းပင်လို နေရာမျိုးမှာလည်း အဲဒီလောက် ပေးရပါတယ်။

အပြင်ထွက်စားဖို့ - မြန်မာနိုင်ငံပြင်ပမှာ အနေကြာလာတဲ့သူတွေ၊ အထူးသဖြင့် ကျန်းမာရေးကို အလေးထား တတ်တဲ့သူတွေကို လမ်းဘေးဆိုင်တွေက မဆွဲဆောင်နိုင်တော့ဘူး။ အထူးသဖြင့် အစားအသောက်ကိုင်တွယ်ပုံ၊ ပန်းကန်ခွက်ယောက်ဆေးကြောပုံတွေကြောင့် လမ်းဘေးဆိုင်မှာ စားဖို့တော်တော်စဉ်းစားရမယ်။ အလယ်အလတ် သန့်သန့်ပြန့်ပြန့်နဲ့ အဆင်သင့်စားစရာ နေရာရှားပါးပါတယ်။ အိမ်မှာချက်စားဖို့၊ အလုပ်သွားတဲ့အခါ ထမင်းချိုင့် ယူသွားဖို့ စီစဉ်နိုင်ရင် စားစရိတ်ကြီးတယ်လို့ မဆိုနိုင်ပါ။ ဒါပေမယ့် တစ်ပါတ်မှာ လေး ငါးခါလောက် ဆိုင်မှာစားမယ် ဆိုရင်တော့ ဒါကိုလည်း အသုံးစားရိတ်အနေနဲ့ ထည့်တွက်ရပါလိမ့်မယ်။

ငွေအရင်းအနှီးရနိုင်မှု - လုပ်ငန်းလုပ်မယ်လို့ စဉ်းစားတဲ့သူတွေက ဒါတွေကို ထည့်တွေးလိမ့်မယ်လို့တော့ ယုံကြည်ပါတယ်။ ဒါပေမယ့် ပညာရှိ သတိဖြစ်ခဲဆိုသလို သတိလက်လွတ်မဖြစ်ရအောင် ဒါလေးလည်း ထည့်ပြောချင်ပါတယ်။ လုပ်ငန်းလုပ်နေရင်း လိုအပ်လာရင် ငွေအရင်းအနှီးရနိုင်ခွင့် အရမ်းရှားပါးပါတယ်။ ကိုယ်ပိုင်လုပ်ငန်းလုပ်မယ်ဆိုရင်တော့ ဒါကို အဓိကထားပြီး စဉ်းစားဖို့ လိုပါလိမ့်မယ်။

ကျန်းမာရေးစားရိတ် - မြန်မာနိုင်ငံမှာလည်း ကျန်းမာရေးစားရိတ်မသေးလှဘူး။ မြန်မာနိုင်ငံကနေ ဘန်ကောက်မှာ ဆေးသွားကုတဲ့သူ အရင်ကထက် အဆပေါင်းများစွာ ပိုလာတာကိုသာကြည့်။ ဒီက အလုပ်ခွင်တွေမှာ ကျန်းမာရေး အာမခံပေးတဲ့ ကုမ္ပဏီ လက်ချိုးရေလို့ ရသေးတယ်။ အလုပ်လက်ခံမယ်ဆို အာမခံကိုမေးကြည့်စေချင်တယ်။ နိုင်ငံခြားမှာ ကိုယ်ဝယ်ထားတဲ့ အာမခံရှိတယ်ဆိုရင် တတ်နိုင်သလောက် ဆက်ထားထားသင့်တယ်လို့ မြင်ပါတယ်။

ဆက်ရန် ...